சர்வதேச நாணய நிதியத்தின் (IMF) பரிந்துரைகளுக்கு ஏற்ப செலவுகளை-பிரதிபலிக்கும் விலை நிர்ணயம் தேவை என்பதை மேற்கோள் காட்டி, ஜூன் மாதத்தில் மின்சார கட்டணங்கள் அதிகரிக்கப்படும் என்று ஜனாதிபதி அனுர குமார திசாநாயக்க கூறியுள்ளார்.
நேற்று (2) தொலைக்காட்சி நிகழ்ச்சி ஒன்றில் பேசிய அவர், இலங்கை மின்சார வாரியத்திற்கு (CEB) மானியம் வழங்க திறைசேரியால் இனி முடியாது என்று வலியுறுத்தினார். “உண்மையான உற்பத்தி செலவுகளுக்கு ஏற்ப மின்சாரம் விலை நிர்ணயம் செய்யப்பட வேண்டும்,” என்றும் அவர் கூறினார்.
மீனவ சமூகம் போன்ற பாதிக்கப்படக்கூடிய சமூகங்களுக்கு திறைசேரி நிதிமூலம் அரசாங்கம் நிவாரணங்களை தொடர்ந்து வழங்கும் அதே வேளையில், அரசுக்கு சொந்தமான நிறுவனங்கள் வணிக ரீதியாக செயல்பட வேண்டியதன் அவசியத்தை ஜனாதிபதி அடிக்கோடிட்டுக் காட்டினார். “இலங்கை பெட்ரோலியக் கூட்டுத்தாபனம் உண்மையான செலவுகளின் அடிப்படையில் எரிபொருள் விலைகளை சரிசெய்வது போலவே, CEBயும் நிதி ரீதியாக நிலையானதாக மாற வேண்டும்,” என்று அவர் மேலும் கூறினார்.
ஊகங்களுக்கு பதிலளித்த ஜனாதிபதி திசாநாயக்க, அடுத்த கட்டண திருத்தம் ஜூன் 1 ஆம் தேதி முதல் அமலுக்கு வரும் என்பதை உறுதிப்படுத்தினார். “இது ஒரு தேர்தல் தந்திரோபாயம் அல்ல. இது திட்டமிடப்பட்ட சரிசெய்தல், இது இலங்கை பொதுப் பயன்பாட்டு ஆணையத்தின் கணிப்புகள் மற்றும் மேற்பார்வையால் வழிநடத்தப்படுகிறது,” என்று அவர் கூறினார்.
CEB சுமார் ரூ. 220 பில்லியன் கடனைக் கொண்டுள்ளதாகவும், அது பின்னர் மறுசீரமைக்கப்பட்டுள்ளதாக அவர் தெரிவித்தார். இதில் ஒரு பகுதி புதிய கட்டணத்தில் பிரதிபலிக்கும். சிறிய அதிகரிப்பாகவே இருக்கும் என்று அவர் உறுதியளித்தார்
