தொடரும் பலஸ்தீன் மக்களின் துயரங்கள் : ஜனாதிபதி கடும் கண்டனம்

கொழும்பு: பலஸ்தீனில் நீடித்து வரும் மனிதாபிமான நெருக்கடியை கண்டித்து ஜனாதிபதி அனுர குமார திஸாநாயக்க கடும் கண்டனம் தெரிவித்துள்ளார். 

ஐக்கிய நாடுகளின் பலஸ்தீன் மக்களுடனான ஒற்றுமை தினத்தை முன்னிட்டு வெளியிட்டுள்ள செய்தியில், அவர் பலஸ்தீன மக்களின் துன்பங்கள் மற்றும் தொடர்ச்சியான அழிவுகளை ஏற்றுக்கொள்ள முடியாது என தெரிவித்துள்ளார்.

காசாவின் மோசமான மனிதாபிமான நிலைமை குறித்து இலங்கை தொடர்ச்சியாக கவலை தெரிவித்து வருவதாகவும், உடனடி போர் நிறுத்தத்திற்கான அழைப்பை ஆதரிப்பதாகவும் ஜனாதிபதி குறிப்பிட்டுள்ளார். 

மேலும், பலஸ்தீனியர்களின் போராட்டம் சர்வதேச சட்டம் மற்றும் சுயநிர்ணய உரிமை ஆகியவற்றில் உறுதியாக நிலைநிறுத்தப்பட்ட அமைதியான மற்றும் சமத்துவமான தீர்மானத்தை பின்தொடர்வதில் இருந்து உலகம் பின்வாங்கக் கூடாது என்றும் அவர் வலியுறுத்தியுள்ளார்.

இந்த இக்கட்டான தருணத்தில் ஒருமித்த தீர்மானத்தை எட்டுவதற்கு சர்வதேச சமூகம் பிளவுகளை ஒதுக்கிவிட்டு, ஒன்றிணைந்த குரலில் ஒன்றுபட வேண்டும் என்று ஜனாதிபதி வலியுறுத்தியுள்ளார். 

மேலும், 1967 ஆம் ஆண்டின் எல்லைகளை அடிப்படையாகக் கொண்ட, இரு நாடுகளின் தீர்வு உட்பட, தொடர்புடைய ஐக்கிய நாடுகளின் தீர்மானங்களுக்கு இணங்க, பேச்சுவார்த்தை மூலம் தீர்வு காண்பதற்கு இலங்கை தனது உறுதியான ஆதரவை மீண்டும் வலியுறுத்தியுள்ளது.

இந்த நிகழ்வில் அமைச்சர் பிமல் ரத்நாயக்க, எதிர்க்கட்சித் தலைவர் சஜித் பிரேமதாச, ஐக்கிய நாடுகளின் வதிவிட ஒருங்கிணைப்பாளர் மார்க்-ஆன்ட்ரே பிரான்சே மற்றும் பலஸ்தீன பொறுப்பதிகாரி ஹிசாம் அபுதாஹா ஆகியோர் உரையாற்றியுள்ளனர்.

இந்த செய்தி உங்களுக்கு பயனுள்ளதாக இருந்தால் ஷேர் செய்யுங்கள்.

#பலஸ்தீன் #இலங்கை #ஜனாதிபதி #மனிதாபிமானநெருக்கடி